18 yoshimdan boshlab to hozirgi kunimga qadar hayot yoʻllarim turli mamlakatlar, rang-barang madaniyatlar va goʻzal qalb sohiblari boʻlgan turli xalqlar orasida kechdi. Ular bilan bir safda yashadim, hayot quvonchlari va tashvishlarini baham koʻrdim, dillariga yoʻl topib, mehr qozondim. Bugun qalbimda ularga nisbatan cheksiz bir iliqlik bor. Bu tajriba dunyoga mutlaqo boshqacha, teran va yangi bir rakursdan qarashimga zamin yaratdi.

Yaratgan Robbimiz mening bu hayot yoʻlimga turli sinovlarni hamroh qildi. Baʼzan bu imtihonlar ogʻir va qoʻrqinchli boʻlsa, baʼzida esa shirin bir qiyinchilik, yoqimli mashaqqat koʻrinishida keldi. Baʼzi pallalarda Alloh bergan behisob neʼmatlarga chin dildan shukr keltirib, Uning ibodatida va itoatida qoim turdim. Ammo, afsuski, nafsimga qul boʻlib, Uning amrlariga isyon qilgan, itoatsizlik girdobiga tushib, ibodatlardan chetlashib qolgan kunlarim ham boʻldi.

Oxirgi yillarda moddiy jihatdan yuksaldim; yaxshi daromadli ish topdim, qornim toʻq, hayotim esa goʻyoki rahbarlarnikidek erkin edi — menga buyruq beradigan yoki qadamimni tergaydigan hech kim yoʻq edi. Ammo bu toʻqchilikning ortida ulkan bir yoʻqotish yashiringan ekan: ishim sabab ibodatlarimni vaqtida ado etishga imkoniyat topolmasdim. Shunda qalbim titrab, Allohga yolvordim: "Yo Robbim! Sening haq yoʻlingda menga toʻsqinlik qiladigan, meni Oʻzingdan uzoqlashtiradigan har qanday dunyoviy manfaat va foydali ish boʻlmasin, uni mendan uzoq qil!"

Bugun his qilyapmanki, Alloh mening oʻsha nolalarimni eshitib, qoʻlimga yangi bir imkoniyat kalitini tutqazmoqda. Ertaga, Inshaalloh, Bolgariyaga uchib ketaman. Ammo bu safarim oldidan qalbimning bir boʻlagi boʻlgan qadrdon shahrim — Istanbulda toʻxtab oʻtishni niyat qildim. Men uchun aziz boʻlgan goʻshalarni, hayotimda oʻchmas iz qoldirgan ustozlarim va dildosh doʻstlarimni ziyorat qilish uchun u yerga albatta qaytaman.

Yana bir ajoyib tasodif: shu yilning boshida ingliz tili ustozimning Telegram kanalida qoldirgan bir sharhimni oʻqib qoldim. Ustozimiz "2026-yil uchun rejalaringiz qanday?" deb savol bergan ekan. Men esa oʻshanda hech ikkilanmay: "Yana 30 ta davlatga sayohat qilishni xohlayman", deb yozgan ekanman. Bugun qarasam, qoʻlimdagi Shengen vizasi menga aynan mana shu imkoniyat va eshiklarni ochib berib turibdi. Hali maqsadimga toʻliq yetmagan boʻlsam-da, meni mana shu darajaga keltirgan Zot, niyatlarimning ijobatiga va oliy maqomlarga albatta yetkazishiga iymonim komil.

Shunday qilib, bu — mening ilk sayohat kundaligim. Kelajakda meni qanday sinovlar, ilohiy mukofotlar va unutilmas xotiralar kutayotganini, Inshaalloh, mana shu sahifada, keyingi postlarimda sizlar bilan ulashib boraman. Yoʻlimiz xayrli boʻlsin!

Hotirjamlik formulasi

More posts

On the Wings of Tawakkul: Everyone Has Their Own Flight

The Beginning of My Journey: Through Trials, Places, and Blessings